ENTRI ROBRIS
Veranu
De seguru que
no jadi falta que vos lo diga peru, por si anguién entovía no se ha enteráu,
tenemus el veranu cerquinina. Y son muchas las cosas nuevas que mos trai esti
tiempu el añu, anque lo que de seguru que primeru vemus es que los días son más
largus, las nochis más cortas y jadi muchu más calol.
El veranu
apencipia el día 21 de Juniu, día que tieni el nombri de Solsticiu de Veranu.
Es el día el añu cona nochi más corta y el día más largu. Dis quí p’alantri los
días apencipian a mermal. Los antigus tenían esti día comu algu emportanti, pos
apencipia un cicru natural, el Veranu, que dura tres mesis y va a moril nel
Tardíu. No es casualidá que hogañu haiga muchas fiestas alreol d’esti día,
fiestas que himus heredáu de los antigus y que hogañu celebramus disfrazás de
fiestas a santus comu San Silveriu (en Peñaparda) o San Juan (otrus pueblus
comu Robrea, Payu o Navafrías).
Tampocu es casualidá que n’esti
tiempu, cuasi siempri uñías a las fiestas los pueblus, entovía se conservin tradicionis
que vienin de mú antigu, comu el levantal un pinu el día la fiesta, o el capadu
que jadin en muchus pueblus, o los ritus relacionáus con el agua. Unus ritus
relacionáus con el pasu de dagal a hombri (el pinu). Otrus, ritus de
purificación (fuegu y agua). Tós conserváus dendi antigu, tós patrimoñu el
pueblu, y tós ritus que tienin de sel conserváus.
Es tiempu tamién de defendel otras
tradicionis. Anque soi de los que piensan que no jadi falta un día especial pa
defendelas, sino que tieni de sel cosa de tó’l añu. Peru n’esti tiempu
apencipian a velsi polus nuestrus pueblus los trajis de charru, los
tamborilerus, los bailaoris,... Apencipian a jadelsi los festivalis de veranu y
la música tradicional brilla lo mesmu qu’el sol d’esti tiempu. Por esu es
curiosu qu’en una comarca comu la d’El Rebollal, tan rica en cultura
tradicional, en sonis, bailis, trajis y estrumentus, no haiga ná relacionáu con
el folclori en ningunu de los cuatru pueblus que jadin las sus fiestas esti
mes... Y que, en teniendu una lengua propia (la “palra d’El Rebollal”, variedad
local de la lengua leonesa), ningunu de los cuatru pueblus haiga sacáu los
cartelis de las fiestas ena su lengua,...
Ésti tamién es tiempu de paseus por
el campu, de reunilsi cona familia, los amigus, de enllenal las callis de genti
y de tomalsi algu fresquitu o dalsi un bañu (el calol mos invita a jadelu). Y
es que, más n’esti tiempu que en ningunu, los nuestrus pueblus están llenus de
vía. Los que están juera güelvin a cassa. Unus, dendi la capital de provincia.
Otrus, dendi otrus lugaris d’España comu Madrís o el País Vascu. Otrus, dendi
entovía más lejotis, comu la Francia. Peru tós con ganas de descansal, de vel a
los que normalmenti tienin lejus y de jadel un montonáu de cosas que no puedin
jadel el restu el añu.
El casu es que el Veranu es un tiempu
especial, un tiempu pa disfrutal. Dendi aquí vos deséu que paséis un güen
veranu.