El puenti de Mayu
ENTRI ROBRIS
El puenti de Mayu
 |
En llegandu Mayu,
paici qu’el mundu se güelvi diferenti: los días son más largus, los pájarus
están enos sus nialis engüerandu y, a los pocus días, conos pajarinus piandu,
apencipian a velsi los campus llenitus de froris,... Y llega el puenti de Mayu,
que tóus trabajaoris y estudiantis esperan con mucha ansia. ¿Y qu’es esu el
puenti de Mayu? Pos ajuntal, con el fin de semana, más d’un día de fiesta, pol
mé de qu’el 1 de Mayu cái en Juevis, y qu’en Madrís tamién es fiesta el día 2.
¿Y qu’es lo que himus celebráu estus dos días? Vamus a velu.
El Primeru de
Mayu, celebráu en tó’l Mundu, es el Día los Trabajaoris. Es un día pa porfial
polus derechus los trabajaoris, de los que lo tienin y de los que no lo tienin.
Se escogió esti día unu de Mayu por sel el día que, nel añu 1886, se jidu una
huelga general enos Estáus Uñíus pa pedil una jorná de trabaju de 8 horas. Ena
ciudá de Chicagu, andi los trabajaoris tenían peoris condicionis de trabaju, la
huelga duró más días y acabó cuandu, en estandu esperandu a la entrá d’una
fábrica que no había jechu huelga, la policía mató a tirus a 6 personas y dejó
herías a muchas más. En recuerdu d’esus muertus y de los derechus polus que
lucharun, se pusu el Primeru de Mayu comu Día el Trabaju.
El día 2 de
Mayu, peru esta vés del añu 1808, jué el día en que Andrés Torrejón, alcaldi de
Móstolis (Madrís), echó un bandu a tó’l país pa que se levantasin contra las
tropas de Napoleón, que habían ocupáu tóa España, mandandu el rey Fernandu VII
al esiliu, poniendu ena su praza a Jussé I (hermanu de Napoleón). Esi mesmu
día, el pueblu de Madrís se levantó en armas contra el ejércitu francés,
levantamientu que apencipió una larga guerra (entri los añus 1808 y 1814) qu’en
España tieni el nombri de “Guerra la Independencia” y que dió hérois tan
conocíus comu Agustina d’Aragón, El Empecináu, los capitanis Daóiz y
Velarde,... O el nuestru Julián Sánchez “El Charru”. Guerra qu’ena nuestra
tierra tuvu jechus tan conocíus comu los sitius de Ciarrodrigu o la Batalla Los
Arapilis. Guerra en metá de la que nació la primera Costitución Española, la
del añu 1812, con el moti de “La Pepa” pol habel síu aprobá el día San Jussé.
Costitución que, no hai que olvial, reconoci comu parti d’España al nuestru
Reinu de León...
Anque, de mó y
manera oficial, se tieni aquel 2 de mayu comu el principiu la Guerra, no
tenemus d’olvial a otrus hérois anónimus que, ena nuestra tierra, tamién se
levantarun contra los soldáus francesis. Curiosu que, dambus dos jechus,
pasasin nel nuestru Reinu de León. Unus días antis de los jechus de Madrís, el
24 d’abril de 1808, la ciudá de León se levantó contra los francesis,
levantandu pendonis por Fernandu VII, al mó y manera en que siempri se jidu con
tólus reyis nel nuestru Reinu de León, además de apencipial a juntal genti pa
luchal contra los ejércitus forasterus.
Peru, con tó y
con esu, no es la primera noticia de lucha entri españolis y francesis en aquel
tiempu. Unus mesis antis, entri Otubri y Noviembri del 1807, pasarun pola
comarca d’El Rebollal los soldáus francesis mandáus por el general Junot. Por
tólus pueblus polus que pasarun juerun pidiendu cassa y comía pa los soldáus. Los
nuestrus pueblus, que antoncis eran mú probis, no les dierun ná, asina que los
soldáus robarun el ganáu a las gentis. Peru las gentis de los pueblus, en
viendu que se queaban sin ná pa passal la enverná, salierun detrás el ejércitu
armáus cono que tenían a manu (ajodis, jorcas, calabodus,...) y acabarun con
alreol de cien soldáus. Peñaparda celebró nel añu 2007 el segundu centenariu de
la conocía comu “Batalla de Peñaparda”.
Porque, anque
s’empeñin los de la teli, nel puenti de Mayu no celebramus el “sol y praya” que
mos quierin vendel. Himus celebráu la fiesta los que lucharun (y luchan) polus
derechus los obrerus, los trabajaoris. Himus recordáu tamién a los que lucharun
(y luchan) pola nuestra tierra.
