La provincia de Ciarrodrigu
¡Lo
qu’arrejundi rebuscal ena nuestra hestoria! El otru día vinun a jadelmus una
vesita unus amigus que, además de conocel la comarca d’El Rebollal (la más al
sul el Reinu de León), querían conocel las tierras del Riba-Coa o, lo qu’es lo
mesmu, esa parti de la Raya que antañu estaba en drentru el Reinu de León
(jasta’l Tratáu d’Alcañicis del añu 1.297). El casu es que unu d’ellus jidu una
pregunta curiosa. Si nel Reinu de León hubiésimus conserváu esa comarca (formá
polus antigus concejus de Sabugal y Los Fayatis), ¿estaría en drentru la
provincia de Salamanca? A lo que escapáu siguió un: “quiciás ena provincia de
Ciarrodrigu”.
¿Vos imagináis
que Ciarrodrigu juesi capital d’una provincia? Los librus d’Hestoria no mos
dejan lugal a la imaginación: hubu una antigua Provincia de Ciarrodirgu.
Las provincias
que conocemus hogañu se jidun nel añu 1.833. Pol mé del escritu de creación de
las provincias, del 30 de noviembri del añu 1.833, al Reinu de León lo
partierun enas que hogañu conocemus comu las provincias de Salamanca, Zamora y
León. Y es que el “y León” de la actual autonomía mienta al Reinu de León, el
de las tres provincias, no otra cosa ninguna. Peru, antis d’esti partimientu,
podemus buscal a la antigua provincia de Ciarrodrigu enos escritus de los
sigrus XVIII y XIX.
Apencipiandu
nel sigru XVIII mos golvemus a encontral (comu en angunu de los mis escritus
d’antañu) con el que conocemus con el nombri del “Libru d’El Bastón”, del añu 1.770, El prólogu de la segunda
edición (del añu 1.929) escritu por Constancio Bernaldo de Quirós, apencipia
asina: “Este libro es un desarrollo (...)
del pasaje relativo a la repoblación de la antigua provincia de Ciudad
Rodrigo”. El mesmu “Libru d’El
Bastón”, comu ya hi escritu anguna vés, apencipia idiendu lo de “La Provincia de Salamanca, en el Reyno de
León, (...)”. Dispués, al mental que la provincia está dividía en dos
partis, Salamanca y Ciarrodrigu, al palral de Ciarrodrigu idi: “como esta Ciudad es capital de la Provincia
declarada por S.M. (...)”. Más craru qu’el agua: Ciarrodrigu era la capital
de la antigua provincia de Ciarrodrigu.
Nel mesmu sigru
XVIII, nel censu del añu 1.798, la provincia de Ciarrodrigu (con lindis
distintas a las del obispáu), tenía 90 pueblus, 97 ilesias, 10 conventus de
frailis y 5 de moljas.
Ya nel sigru
XIX, nel libru númeru 6 de la “Novísima
recopilación de las Leyes de España” (1829), conas leyis de los añus 1.805
y 1.806, mienta en dos leyis la güelta a poblal de la provincia de Ciarrodriu.
Leyis comu las que ya se habían jechu nel añu 1.769 pa golvel a tral genti a la
provincia de Ciarrodrigu.
Se podía seguil
asina con muchus escritus, y de seguru que en buscandu se podrían encontral
muchus más. Peru comu muestra me paici que vali. Ciarrodrigu jué antañu (y en
un tiempu no mú lejotis) capital de la provincia del mesmu nombri. Provincia que
desapareció cuandu partierun el Reinu de León enas provincias de Salamanca,
Zamora y León.
Hogañu, en
muchas cosas, Ciarrodrigu entovía furrula comu si juesi una capital de
provincia, más emportanti antañu y que jasta pudu tenel en drentru las tierras,
pueblus y gentis del Conceju de Sabugal, hogañu portugués peru antañu leonés.
Digu que furrula en muchas cosas comu una capital, peru anda falta de servicius
que jadrían a Ciarrodrigu y a tóa la comarca muchu más emportantis, cosas comu
un hospital, o estal bien uñía pol mé los trenis con otrus lugaris. Peru esu es
otra hestoria...