Entri Robris
El fin el mundu
 |
Comu si juesi
la primera trompeta el Apocalisis, esti sábadu 22 de Jebreru pasó algu que, a
pocu que mos paremus a pensalu, mos idi cuántu mos himus humildáu a lo modernu:
¡el mundu estuvu angunas horas sin el “Whatsapp”!
O, lo qu’es lo mesmu, dejó de furrulal esi programa que mos deja chalral con
cualisquiera que tengamus nel nuestru teléfonu móvil pol mé de letras, númerus y
dibujus.
Acostumbráus
comu estamus hogañu a estal siempri uñíus a tó’l mundu pol mé los teléfonus,
escapáu mucha genti, tóa afrontá, escribía enas redis socialis preguntandu a
tólu que se movía si les furrulaba el “Whatsapp”.
¡Qué ibamus a jadel agora sin el “Whatsapp”!
¡Tenemus de buscal otru programa! El otru programa al que la genti corrió a
remualsi, un tal “Telegram”, tamién
dejó de furrulal pol mé el montonáu de genti que lo apencipió a ussal de golpi
y porradu.
El casu es que
mos himus jechu dependientis de lo modernu. ¿Vos acordáis cuandu la genti era
capás de queal en un lugal sin tenel móvil? ¿Y cuandu con los teléfonus ná más
podían mandalsi mensajinus? Dispués llegarun los que tenían pa jadel afotus.
Agora, con el interné baratu pa tólus móvilis, tó’l mundu puedi vel cualisquiel
página, chalral con esus programas que mentamus aniantis, mandalsi afotus,
cancionis, vídeus,... Agora, el problema es el de “¡que se m’acaban los datus!”
Tantu mos himus jechu dependientis d’estus pasatiempus (pos cuasi si lo ussamus
ná más que pa esu) que mos paici que, cuandu algu falla, s’acaba el mundu.
Antañu, estu
del fin el mundu era otra cosa. Sin tenel en cuenta los miéus de los cambius de
mileniu (miéus a las vedis dirigíus dendi los diferentis poderis), el fin el
mundu venía dáu pola naturaleza. El añu natural moría con la muerti la Madri
Naturaleza. El Solsticiu d’Inviernu, a finalis del mes de Diciembri, siempri
jué mú celebráu pol mé de que, dendi esti solsticiu, los días apencipiaban a
sel más largus y las nochis más cortas, señal de que la vida apencipiaba a
ganal terrenu a la muerti.
Y llegamus a
esti tiempu: los Carnavalis o Antrueju. Un tiempu esti que, unas vedis nel mes
de Jebreru, otras vedis nel mes de Marzu, son las fiestas que mos idin que la Primavera
ya está cerca: no jadi tantu fríu, apencipian a salil angunas froris, se ven ya
brotis verdis enos campus (de los de verdá, no los inventáus polus
políticus)... Güelvi la vida a la Tierra, apencipia’l añu natural. Y, del mesmu
mó y manera qu’enos tiempus modernus jademus una fiesta bien grandi nel cambiu
de añu entri’l 31 de Diciembri y el 1 d’Eneru, los antigus celebraban esi nuevu
añu, esa güelta de la vida con unas fiestas grandis que han llegáu jasta
nusotrus y que vamus a celebral estus días.
Angunu quiciás
piensi: “¡peru qué idi esti dagal!”. A lo que se puedi respondel d’un mó y
manera mú cendillu: el calendariu que ussamus hogañu no ha esistíu siempri,
asina que no siempri el añu apencipió el día unu d’Eneru (ni siquiera hogañu
apencipia en tó’l mundu el mesmu día). Antañu, nel mundu romanu, el añu
apencipiaba nel mes de Marzu. Con pocu que mos paremus a pensal, vemus qu’es
asina. Setiembri tieni esi nombri porque era el sétimu mes; Otubri, el otavu;
Noviembri el novenu y Diciembri el décimu. ¿Es casualidá que se parezan esas
palabras? No.
Lo qu’es bien
seguru es que los Carnavalis son una fiesta bien grandi y que tós vamus a
celebral y a disfrutal, lo mesmu en Ciarrodrigu (los más famosus de tós) que en
cualisquiera de los pueblus enos que vivamus a lo largu y anchu el nuestru
Reinu de León. Celebremus que, anque no furruli el Whatsapp, el mundu no
s’acaba. ¡Güenus Carnavalis a tós!
