Jasta siempri, Tia Gora

Hai unus días, el Domingu 19 de Juliu, pocu antis de la medianochi, mos dejó, a los 110 añus, la Tia Gora de Peñaparda. Güenu, a los 110 añus y mediu. Habría jechu los 111 el día 4 d’Eneru, pos jué esi mesmu día del añu 1905 cuandu vinu al mundu.

110 añus son muchus, muchus añus. Y dan pa muchu, tantu comu pa hbel estáu jasta en Francia ganandu el dineru pa pagal la cassa andi estuvu viviendu los últimus 80 añus, con el postigu de maera que da a la calli prencipal. Dendi que jidu los 100 añus, cá vés que la Tia Gora cumrpía otru más era un día un pocu más especial pa tós, pos era mucha la genti que pasaba pola su casa a felicitali esi día, una muestra más de la querencia que la genti de Peñaparda tenía a la mujel.

Peru no podemus quealmus ná más en los añus que tenía, lo que jadía d’ella no sólu la mujel más vieja de Peñaparda o de Salamanca, sinu de tó’l Reinu de León y una de las más viejas d’España. La Tia Gora era una de las últimas mujeris auténticas d’El Rebollal, una de las que mejol uñían, en una mesma presona, tóas las cossas que tienin de vel con la cultura tradicional y el sentil d’un pueblu.

P’apencipial, la Tia Gora era una de las pocas mujeris que quéan vestías al mó y manera tradicional, con las sus vestimientas siempri negras, con la su saya, la su chambra, el su pañuelu atáu a la cabeza,... En la su cassa siempri arcendía la lumbrita andi, mientris pudu, jadía los cachuelus, los frejonis,... O esi café que, en los primerus tiempus qu’estuvimus nel lugal, mos ofrecía en una escuílla.

Tamién en lo que conocemus comu folclori tnía de vel la Tia Gora. Entovía con más de 100 añus, cuandu me ponía a tocal el tamboril ena puerta de cassa se ponía a bailal el ajecháu o el sorteáu. El corríu, al sel más ligieru, ya le costaba más. Y es que, lo que bien s’apriendi, tardi s’olvía. ¿Y qué podemus idil del panderu? Que tamién lo sabía tocal, bie abondu, y cá vés te lo tenía enas manus mos cantaba lo mesmu un ajecháu qu’un salteáu o un corríu. Y, cuandu no lo tenía, acompañaba los sus cantigus dandu con un pucheru ena ventanina de la codina, y nusotrus la barruntabamus dendi la tahona. Unus cantaris que siempri mos alagraban la mañana. ¡Cuantu vamus a echalus de menus!

Tia Gora tamién era una de las que mejol conservaba la palra d’El Rebollal (el mó y manera que, n’El Rebollal, palramus la Lengua Leonesa, por suerti, quéa entovía mucha que palra la nuestra lengua). ¡Cómu mos gustaba il a su cassa y pasal un ratinu chalrandu con ella! Y recordandu los tiempus antigus, de cuandu estuvu en Francia, del tiempu la guerra, de la genti que ya no está, de lo que sembraban los mis agüelus,... Y oyelu de primera manu, y vel cómu la Tia Gora chalraba con orgullu la nuestra palra,... Por esu, comu homenaji a la Tia Gora esta vés el escritu va ná más en la palra, la única qu’ussó ella. Quien de verdá quiera a la nuestra tierra y a la nuestra cultura, lo comprienderá.

Con la Tia Gora se mos va un cachinu de la nuestra historia, un poquinu de la nuestra cultura. Peru mas que ná se mos va una persona comu no hubu otra. Pa la su familia jué madri, agüela, bisagüela, tataragüela, tía, comadri,... Pa nusotrus jué la nuestra vedina, la que mos alegraba con los sus cantaris, la que mos convidaba a una escuílla de café, la que agraecía cá vesita que le jadías. Siempri mos quearán los güenus ratus que pasamus con ella, las sus historias, la su alegría, la su puerta abierta a tó’l mundu que quiera passal. Jué una suerti el habel podíu conocela y habela teníu de vedina.

Jasta siempri, Tia Gora.

Por José Benito Mateos Pascual