Orgullosus de lo nuestru

|

ENTRI ROBRIS

(Ir a versión en castellano)


foto_2

         En estus tiempus vemus ena teli tólus días a los equipus del fútbul en estu que tieni de nombri el Mundial, andi s’ajuntan los mejoris equipus pol nacionis. Van juegandu partíus y, los mejoris (o los que más suerti han teníu) van pasandu a la sotra ronda. Los nuestrus, los del equipu d’España, juerun los primerus en golvelsi a cassa.

Con tó estu de que al equipu d’España lo han elimináu antis de tiempu, escapáu han salíu vodis que les han jechu un traji nuevu, de seguru que las mesmas vodis que no hai muchu tiempu que les alababan por ganal el Mundial de Suláfrica y las dos Urocopas. ¡Qué poca mimoria! Craru, que tamién tenemus a los qu’están con esti equipu jasta la muerti y, anque haigan perdíu, están igual d’orgullosus d’ellus polus muchus añus que mos han jechu disfrutal y porqu’es el equipu que representa al nuestru país.

Y tó esu está mú bien peru, ¿por qué no estamus igual d’orgullosus de los demás equipus del nuestru país? Porque tamién han ganáu muchas cosas los equipus de baloncestu, de fútbul sala, de balonmanu, de güatelpolu, de joquei con patinis, de joquei sobri yerba,... Y cuandu hai mundialis d’esus deportis no salin banderas a la calli, ni paici que naidi está orgullosu d’ellus. Anque esté bien abondu el estal orgullosus del nuestru equipu de fútbul, no me paici que tenga de sel más emportanti que los demás equipus d’otrus deportis.

Y, sin querel jadel de menus a los deportis, ¿es que no tenemus nel nuestru país, y ena nuestra tierra, cosas de las qu’estal orgullosus? Pos craru que sí, y d’esu tendríamus d’estal muchu más orgullosus. Tendríamus d’estal muchu más orgullosus de la nuestra cultura y, a las vedis, a mucha genti le paici que lo de juera es mejol o, comu pasa conas lengua, que ná más vali que una, lo que jadi a la nuestra tierra muchu más probi. La mesma Costitución (sí, esa que los políticus sacan del cajón cuandu les vieni bien) idi que la riqueza en palras del nuestru país (entri las que tenemus a la nuestra palra leonesa d’El Rebollal) es una riqueza que mereci especial respetu y protección. Cuandu estu se jaga sí que será algu de lo qu’estal orgullosus.

Tendríamus d’estal tamién mú orgullosus de la nuestra hestoria, pos la Península y las gentis qu’en ella vivin y vivierun han jechu cosas mú grandis en tó’l Mundu. Dendi aquí salierun los primerus hombris que dierun la güelta al Mundu. Aquí estuvun y dejarun muchu celtas, visigodus, morus, judíus, cristianus,... De la Península salierun Premius Nóbel comu Ramón y Cajal (Medecina), Camilo José Cela, Ortega y Gasset y José Saramago (ésti últimu, portugués, Literatura). Esu sí qu’es, de verdá, pa estal orgullosus. ¿Y qué pasa? Que muchas vedis paici qu’una parti de la hestoria quieri escondelsi. ¿Cómu puedi sel que los inglesis haigan presumíu tantu tiempu de parlamentu y cortis cuandu las primeras Cortis d’Uropa se jidun nel nuestru Reinu de León nel añu 1188? ¿Y qu’en España cuasi naidi lo sepa?

De verdá, algu falla ena nuestra tierra cuandu no jademus bandera de lo ricus que somus en lenguas: leonés (lengua en drentru la qu’está la nuestra palra d’El Rebollal), castellanu, vascu, gallegu, catalán, aragonés, aranés, portugués,...

De verdá, algu falla ena nuestra tierra cuandu no jademus bandera de la nuestra naturaleza, sinu tólu contrariu, conas orillas del mal derrotás y los montis en caminu,...

De verdá, algu falla ena nuestra tierra cuandu, por tóa cultura, se vendin ná más que tópicus no ya nel estranjeru, sinu en drentru mesmu el nuestru país, comu si tós tuviésemus que sabel bailal sevillanas o sabel toreal, o sabel tocal la guitarra. ¿Y las nuestrus charrus? ¿Y las nuestras charrás? ¿Y las nuestras jotas y fandangus? ¿Y los nuestrus corríus? ¿Y la nuestra gaita charra? ¿Y el panderu cuadráu? ¿Y la gaita gallega? ¿Y la sanabresa? ¿Y l’alboka? ¿Y la dulzaina?

La nuestra tierra tieni un montonáu de cosas de las qu’estal orgullosus. Y, si de verdá estamus orgullosus de la nuestra tierra, quedremus que siga siendu igual de rica en hestoria, en cultura, en lenguas, en naturaleza, en patrimoñu,... Tenemus d’estal orgullosus de la nuestra tierra, tenemus d’estal orgullosus de lo nuestru.