¡Lo que himus muáu!

|

ENTRI ROBRIS

¡Lo que himus muáu!

(Ir Versión en Castellano)


foto_2

Si es que no se mos puedi dejal solus. Deja unu d’escribil dos semanas de ná... ¡y el país enteru se dá la güelta d’arriba abaju!

Apencipiamus con los votus al Parlamentu Uropéu. Anque ena nuestra tierra la cosa no ha muáu muchu, nel restu el Estáu himus vistu comu los dos grandis partíus, PP (Partíu Populal) y PSOE (Partíu socialista Obreru Español) han bajáu muchu, tantu que se barrunta el fin d’esu que se llama “bipartidismu” (o sea, que tó’l podel y los gobiernus se los repartin cuasi entri dos partíus). El que haigan subíu muchu otrus partíus, sobri tó IU (Izquierda Uñía) y UPyD (Uñión, Progresu y Democracia), lo mesmu d’un láu que del otru, y que haiga aparecíu de debaju las piedras otru partíu, PODEMOS (PODEMUS), que ha sabíu ganalsi a la genti ha jechu vel que los españolis tenemus un mó y manera de pensal muchu más rica de lo que se suponía. Jasta’l PREPAL (Partíu Regionalista el País Leonés) áina si ha sacáu el dobri de votus que jadi cincu añus. N’esta riqueza nel mó y manera de pensal (además d’ena nuestra riqueza cultural, con lenguas y tó) es andi está la juerza d’esti país. Probitu aquel país nel que ná más vali un únicu mó y manera de pensal...

         Peru ahí no s’acaba la cosa. Resulta que, pol mé de tólu que han bajáu en votus, el jefi del PSOE (Partíu Socialista Obreru Español) ha dichu que se va. Se mos va a jadel raru, pos llevaba un montonáu d’añus metíu n’estu de la política comu deputáu, comu menistru, comu jefi de la oposición,... El casu es que son muchus los que quierin cogel el su lugal. Esti veranu mos enteraremus de cómu va a sel la cosa. Comu se idi normalmenti: “a rei muertu, rei puestu”.

         Reflán que mos lleva al tercel gran asuntu que ha pasáu estus días: que vamus a mual de Rei. Ayel mesmu, Juan Carlus I diju que dejaba de sel Rei d’España, y que el sotru rei iba a sel el su hiju, el Príncipi d’Asturies, que será rei con el nombri de Jelipi VI (no tenemus d’olvial que, entri los sus títulus, además d’el de Rei d’España tieni tamién el títulu de Rei de León). No quieru entral ena chalra de si Repúbrica o Reyis, pa esu ya están los “profesionalis”. Tampocu no voi a entral en alabancias de baldi (no soi alabanciosu) ni pa unu ni pa’l otru. De seguru que dambus dos han jechu y van a jadel cosas mú bien y otras mú mal. Peru yo no soi quien pa julgalis, y menus con tó de recienti. Pa esu está la Hestoria. Esperemus que, dis quí a un sigru, los librus d’hestoria palrin mú bien de dambus dos, señal que lo han jechu bien.

         Voi a acabal palrandu de fútbol. Lo primeru, noragüena al Ciarrodrigu, que ha subíu de categoría. A vel si cogi carrerilla y pa’l sotru añu repitin el subil, esta vés de Preferenti a Tercera. ¿Y por qué no de Tercera a Segunda B? ¿O a segunda? Soñal es de baldi y, con ganas e ilusión se puedi jadel cualquiel cosa que te pongas a jadel. Si no, que se lo digan al equipu vascu del Eibal, el equipu d’una ciudá de 27.000 habitantis que se ha ganáu, con tól derechu, un lugal entri los grandis. ¿Por qué no el Ciarrodrigu? Tó es ponelsi...