ENTRI ROBRIS
Los votus
El 25 de mayu
son los votus pa’l Parlamentu Uropéu. ¿Qué quieri idil esu? Que vamus a
escogel, con el nuestru votu, a la genti que va a represental al nuestru país
enos asuntus d’Uropa.
El casu es que
estus días vamus a oyel cosas dendi tólus láus. Comu siempri, los grandis
partíus mos van a prometel el sol, la luna y las estrellas. Promesas que, de
seguru, se le habrán olviáu el día 26. Otros dirán que los de siempri ya no
valin, que es mejol remual el votu y dálsilu a otrus partíus. Unus van sólus,
otrus van cona compaña d’otrus partíus, uñíus y rebujáus pa esti tiempu y estus
votus. Los unus palrarán de lo malus que son los otrus; los otrus de lo peoris
que son los primerus. De seguru que tós palrarán de lo malus que son tós menus
ellus. Partíus grandis, partíus chicus, partíus que defiendin el centralismu,
partíus que defiendin una región, otrus que defiendin que la su tierra sea un
país aparti, otrus que defiendin el nuestru Reinu de León, otrus que defiendin
la naturaleza,... Entri tós me paici que jadin 39.
¿Y a quién
votal? Pos hombri, esu no voi a idilu yo, está craru. Y menus porque soi parti
interesá ya qu’estoi en drentru d’una de las candidaturas, la del PREPAL. Lo
que importa es que esi domingu 25 de mayu vayamus tóa a votal, porque es algu a
lo que tenemus derechu y porque vamus a escogel a los que mos van a represental
en Uropa. Votemus lo que votemus estará bien, pos es un mó y manera de idil a
los nuestrus representantis qu’estamus aquí. Y, digan lo que digan ena campaña,
tólus votus valen lo mesmu, los que se dan a los partíus grandis y los que se
dan a los partíus chicus.
Habrá partíus con más votus, los
habrá con menus votus, los habrán que dirán que han ganáu, otrus dirán que no
han perdíu (es curiosu, enas eleicionis naidi pierdi nunca),... Peru si vamus a
votal la que ganará será la democracia. Y esta democracia (el “gobiernu el
pueblu”) es algu que tós tenemus el debel de cudial. La genti puedi cudiala
yendu a votal cuandu hai eleicionis, pos agora mesmu es el votu el que le puedi
idil a los políticus si lo han jechu bien o mal. Los políticus teniendu mú
presenti que, una vés que han salíu elegíus, no representan ná más a los que
los han votáu, sinu a tós, y teniendu mú presenti qu’el nuestru votu no es un
chequi en brancu pa que jagan lo que quieran.
Dendi esti
rinconinu vos animu a il a votal esi domingu 25 de mayu. Es unu de los nuestrus
derechus, no lo dejemus pasal.