Felís Día el Libru
Felís Día el Libru
 |
Comu tólus añus, llegamus a esti día 23 d’abril. Y, comu tólus añus, tenemus muchas celebracionis por tólus láus: los catalanis San Jordi (San Jorgi) con el libru y la rosa; los aragonesis, San Jorge (San Jorgi). Y los leonesis, ¿tenemus algu de celebral? Pos sí, por qué no.
Las gentis el Reinu de León tenemus angunas cosinas que celebral. La primera, jué un 23 d’abril del añu 1229 cuandu los soldáus de Alfonsu IX reconquistarun pa’l Reinu de León la ciudá de Cáciris. Ciudá ésta que, dendi entoncis, estuvu siempri en drentru la Hispania cristiana. A Cáciris la seguiría, pocu tiempu dispués, la ciudá de Badajó.
¿Tenemus algu más de celebral las gentis el Reinu de León? ¿Tenemus algu más de celebral las gentis que vivimus enas provincias de Salamanca, Zamora y León? ¡Craru que sí! El Día el Libru.
El Día el Libru se jadi prejisamenti el 23 de abril por sel el día en que murierun tres de los grandis escritoris que ha dáu la Humanidá: Shakespeare, Cervantes y el Inca Garcilaso de la Vega. Tós tres dejarun esti mundu el 23 d’abril del añu 1616. Asina, en recuerdu suyu, y nel de tólus escritoris, grandis y chicus, ya nel añu 1995 la UNESCO pusu esti día tan señaláu comu Día el Libru, anque en España ya se jadía esi mesmu día dendi’l añu 1930. Esti Día el Libru trata de que la genti lea más. Nel mi parecel, y nel de mucha genti, los librus están acomolgaítus de saberis, además de podel llevalmus, conas sus hestorias, a tierras y tiempus lejanus, muchu más que cualisquiel cosa de las que hogañu podamus vel ena teli. Librus andi podemus aprendel y rebuscal ena nuestra cultura. Librus andi descubril la hestoria de la nuestra tierra. Librus escritus en tóas las lenguas,...
Esti añu, además, el Día el Libru tieni un recuerdu especial pa Gabriel García Márquez, pa mi unu de los más grandis (si no el más grandi) escritol del sigru XX. Anque de seguru que estáis más que jartus d’oyelu mental, el libru “Cien Años de Soledad” (Cien añus de soledá) es unu de los mis librus preferíus dendi que, hai añus ya, me lo jidun leel nel istitutu y, comu no pué sel menus, vos convíu a leelu. De no tenel esti a manu, de seguru qu’encontráis un montonáu de librus que “llevalvus a la boca” y que jadrán d’esti Día el Libru algu especial.
¡FELÍS DÍA EL LIBRU!
