Las froris del campu
ENTRI ROBRIS
Las froris del campu
 |
¡Qué polías son
las froris! Las hai de tóas las coloris: brancas, amarillas, azulis,
colorás,... Las hai a la vera los caminus. Las hai al láu los regatus,... Y vel
a las vaquis nel práu conos sus bederrus. Y vel a las cabras conos sus chivinus,
y a las ovejas conos sus borreguinus, y a las gallinis conos sus pollinus, y a
la burra conos sus buchis,... ¡Peru qué guapu tó!
Jadi sol, los
pajaritus cantan, las nubis se levantan, y tó’l mundu corri polas callis alegri
y contentu: los dagalis, los sus padris, los sus agüelus,... ¡Qué mundu tan
maravillosu! ¡Qué mundu tan políu!
Y ye verdá. El
nuestru mundu es maravillosu peru, anque a anguna genti le gustaría que ná más
se palrasi y se viesi lo que hi puestu enas rayinas d’antis, y que sigamus
ciegus sin vel tólu que pasa alreol nuestru, las cosas no son asina comu mos
las quierin pintal. Y los que las vemus d‘otra colol a la que mos vendin no
debemus callal.
Pos sí, ye
verdá que las froris son mú polías. Ye verdá que las hai de tóas las coloris.
Lo mesmu que los pareceris de la genti. ¿Vos imagináis que nel campu ná más
juesi tó de una colol? Pos entri la genti tampocu. Y asina tieni de sel. Si no
juesi asina, acabaríamus nun mundu apaecíu al que escribió Aldous Huxley nel su
libru “Un mundu felís”, un mundu nel que la genti ya nacía programá pa sel ricu
o probi, pa sel médicu o labraol,... Sin oportunidá de sel otra cosa, sin podel
escogel qué quería sel. O comu ena película “Gattaca”, andi a angunus puestus
ná más podían il los que tuviesin los genis perfectus. O comu en otra película,
“Fahrenheit 451” nel qu’estaban prohibíus los librus porque, sigún el gobiernu,
leel jadía que los hombris apencipiasin a sel diferentis en vés de sel tós
igualis, de mó y manera que se chiscaban tólus librus pa quemalus y jadelus
desaparecel...
¿Estamus tan
lejus d’esus mundus inventáus? Quiciás no. Hogañu mos quierin vendel un mundu
de dos coloris. Paici que tó tieni de sel o brancu o negru, o craru o escuru.
Nel fútbol, paici que ná más están el Madrís y el Barsa cuandu tenemus otrus
equipus comu el Atléticu, el Valencia, el Bilbáu,... O, por qué no, el
Ciarrodrigu. Un montonáu. Conos políticus quierin jadel lo mesmu. ¿Es que ná
más están el PP y el PSOE? Pos no. Tamién tenemus a UPS, IU,... O, por qué no,
el PREPAL. ¿Es que n’este país nás más hai una lengua? Tampocu. Además de la
oficial del Estáu tenemus el gallegu, el vascu, el catalán (estas tres tamién
son oficialis) y otras comu el aragonés, el leonés (en drentu la qu’están la
nuestra palra d’El Rebollal, el asturianu, el estremeñu, el patsuezu,...), el
aranés, la “fala del Val de Xálima”,... Ena comarca de Ciarrodrigu mesmu se
palran tres: portugués, leonés y castellanu.
Asina podríamus
seguil “jasta’l infinutu y más allá”, comu idía el otru. Anque mos quieran
vendel un mundu de cara o crús, un mundu en brancu y negru, a mi me paici muchu
más guapu un mundu con tóas las coloris, comu el Arcu del Señol. Amigus, las
froris del campu, lo mesmu qu’el nuestru mundu, son polías porque tienin tólas
coloris. No vos dejéis albardal, ni le jagáis casu a los que mos quierin quital
las coloris del nuestru alreol. Porque sin ellas, sin las coloris, el mundu
será muchu más féu.
