La hestoria que s’escuendi
La hestoria que s’escuendi
 |
Que la hestoria
de la nuestra tierra es mú rica ya lo hi mentáu abondu de vedis. Y qu’esta, la
nuestra hestoria, no la conoci la nuestra genti quiciás tamién lo haiga dichu
anguna vés. Tan desconocía es que, muchas vedis, unu se pregunta si es que la
genti pasa de sabel de la su tierra, o es que ena escuela no se l’aprendin a
los nuestrus dagalis, o es que mos quierin vendel otra cosa que pocu o ná tieni
de vel cona nuestra tierra.
Esti viernis se
presenta en Ciarrodrigu un libru alreol el Reinu de León, reinu en drentru el
que siempri ha estáu la nuestra tierra y al que tantas cosas güenas le debi.
¿Cuánta genti de Ciarrodrigu, d’El Rebollal, los Agadonis, Argañán y demás
lugaris de la nuestra comarca sabi que la nuestra tierra está en drentru el
Reinu de León? Quiciás habría que jadel una encuesta pa sabelu, peru de seguru
que mucha genti no lo sabi porque nunca naidi le ha contáu esa parti de la
nuestra hestoria, esa parti que s’escuendi...
El casu es
qu’esi libru alreol el Reinu de León está jechu pol mé el 1.100 cupriañus del
nacimientu el mesmu, nel añu 910. ¿Cuánta genti sabi éstu? Porque de seguru que
tós himus oyíu palral el milenariu el Reinu de Graná, o el de Badajós,... Y el
que de verdá es el nuestru, el Reinu de León, paici comu si quijieran borralu.
¿Por qué? ¿Qué himus jechu las genti el Reinu de León pa que quieran borralmus
de la hestoria?
En dejandu a un
láu esu de qu’el “Santu Grial” lleva cuasi 1.000 añus en León (quiciás sí,
quiciás no, me paici que no hai mó y manera de sabel si ye verdá) hai algu que,
pol cima de tó, poni al nuestru Reinu de León comu unu de los más emportantis
no ya de la Península, sinu de tó’l Mundu: el Reinu de León jué el primeru en
jadel Cortis, nel añu 1.188. Alfonsu IX, Rei de León, llamó pol vés primera a
tólus representantis de las ciudadis pa tratal los asuntus del Reinu. Juerun
las primeras Cortis en tó’l Mundu. Y lo mesmu Ciarrodrigu comu Salamanca
estuvun representás, comu parti que siempri han síu del Reinu de León.
Y no sólu esu, en esas Cortis el Rei pusu
pol escritu, ena “Carta Magna Leonesa”, los derechus de los ciudadanus: se
defiendi a los ciudadanus contra los abusus de los poderosus sin miral si es
hombri o mujel, si es ricu o probi, se jadi inviolabli el corréu y la cassa, el
Rei no puedi jadel la guerra sin que se lo premitan las Cortis,... Derechus que
hogañu vemus normalis peru que nacierun en aquel benditu añu 1.188 nel qu’el
Reinu de León y la su genti, la nuestra genti, estaba ena lantrera el Mundu.
Además, Alfonsu IX jidu, nel añu 1.218, la Universidá de Salamanca pa que las
gentis del Reinu de León no tuviesin que salil a estudial juera.
Ciarrodrigu tamién le debi muchu a
estal en drentru el Reinu de León. Gracias a Fernandu II de León Ciarrodrigu
tieni obispáu, y tuvu fuerus, se jidun las primeras murallas, tieni el títulu
de Ciudá,... Y jué güelta a pobral. Si el Reinu de León, quiciás Ciarrodrigu no
estuviesi con genti... Fernandu II tieni bien merecía la calli y el morumentu
nel su honol. ¿Y la comarca? Pos tamién s’enllenarun de genti pueblus comu
Robrea, Villarrubias, Payu, Navafrías,... Genti que truju la su cultura y la su
lengua. Por esu los trajis d’El Rebollal son comu son, por esu los sonis y
bailis d’El Rebollal son comu son, por esu n’El Rebollal entovía palramus
leonés (esa otra lengua comu pocu olvidá, y qu’entovía se puedi oyel palral en
muchus lugaris y se puedi rebuscal enas palras de tólus pueblus de la comarca
de Ciarrodrigu)
Esta es la parti de la nuestra
hestoria que s’escuendi. Esta es la parti de la nuestra cultura que s’escuendi.
Es tiempu de que sepamus quienis somus.
