Entri Robris
Se juerun dos grandis
La semana que
pasó mos dejarun dos grandis de la política. El juevis 20 de Marzu se jué Iñaki
Azkuna, alcaldi de Bilbáu. El domingu 23 el que mos dejó jué Adoflo Suárez,
presidenti el Gobiernu duranti la Transición.
No quieru sel
alabanciosu, y menus n’esti tiempu de la muerti nel que siempri vienin tóas las
alabancias, y vienin sobri tó d’aquellus que más dañu te quisun jadel en vía.
Bien se idi esu de que “lejus tengas el tiempu las alabancias”, porqu’es cuandu
llegan señal de que ya has dejáu esti mundu. Peru estus dos hombris merecin, lo
menus, un recuerdu, y que sepamus quiénis juerun y qu’es lo que jidun.
El primeru,
Iñaki Azkuna, ha síu alcaldi de Bilbáu alreol de quinci añus por el PNV (Partíu
Nacionalista Vascu). Cuandu ya se habían íu cuasi tóas las fábricas, supu jadel
de Bilbáu una ciudá viva, la remuó de tal mó y manera que la antañu “fea”
Bilbáu es conocía en tó’l mundu comu una ciudá moderna y acomolgaíta de cultura
y de vía que deja encantáu a tó’l que le jadi una vesita. Agora es una ciudá mú
polía. ¿Quién no ha oyíu palral de la ría de Bilbáu, o el Guggenheim, o el
antigu y el nuevu San Mamés, el tranvía,... O tantas y tantas cosas que han
jechu olvial a esa Bilbáu pola que cuasi naidi quería passal. El amol a la su
ciudá jidu que, jasta en estandu ya mú enfermu, siguió jadiendu cosas y
saliendu a la calli. Tó esu jidu que nel añu 2013 juesi nombráu comu “Mejol
Alcaldi el Mundu”.
El segundu
hombri jué Adolfo Suárez. Jué, pola UCD (Uñión de Centru Democrática), el
primel presidenti d’esta democracia moderna (no olviémus que antis de la Guerra
Civil tamién hubu una democracia). En viniendu de los tiempus de la dictadura,
en tólus láus se ha destacáu que jidu pol cerral las jerías abiertas dendi la
Guerra. En siendu él presidenti (entri los añus 1976 y 1981) se legalizó el
Partíu Comunista (lo que ayuó a cerral muchas jerías), jidu la España de las
autonomías (conos sus aciertus y fallus) y se jidu la Costitución que agora
tenemus. Jué un hombri que quiju palral con tós, sabel el parecel de tós y
quiju tenel en cuenta las ideas de tós. Estas últimas cosas jidun que tuviera
muchus enemigus juera y drentru el su partíu. Tantu tuvu que jartali estu que
ha síu el únicu presidenti el Gobiernu que ha dejáu el su puestu. Dispués d’esu
fundó otru partíu, el CDS (Centru Democráticu y Social), con el que tamién jué
diputáu.
Tampocu quieru
contal tóa la su vía. Pa esu ya están las encicropedias y de la su herencia
palrarán los librus d’hestoria. Quería que, en sabiendu un pocu más d’estos
hombris, los políticus de la nuestra tierra quieran tomal ejempru. Que los
nuestrus diputáus, senaoris y presidentis quieran chalral con tós y sabel los
pareceris de tós, porque tós cuentan y tós tienin el mesmu valol, que no s’encierrin
ena su mayoría absoluta, nel “ordenu y mandu” y nel “comu tengu mayoría sólu
vali lo que digu yo”. Que los nuestrus alcaldis quieran sel los mejoris
alcaldis el mundu, que quieran jadel por el su pueblu tó lo que se puéa y un
poquinu más. Que luchin pol vel los sus pueblus llenus de vía. Que luchin por
que los sus pueblus sean los más políus, conas mejoris callis, conos mejoris servicius,...
Que luchin pola cultura de los sus pueblus (no se puedin dejal de láu las
lenguas menus grandis, que tamién son cultura),...
Mos dejarun dos
grandis. Ojalá dis quí p’alantri vengan muchus más comu ellus.