Entri Robris

|

San Patriciu 

(Ir a versión Castellano)

foto_2

         Los nuevus tiempus, y estu que llaman “globalización” mos train muchas vedis cosas de juera que, asina sin pensalu, paici que pocu o ná tienin de vel cona nuestra tierra leonesa. La fiesta de San Patriciu, que se jadi el día 17 de marzu, es una d’estas cosas.

         San Patriciu jué un hombri que, nel sigru V, jué por tóa la Irlanda pregonandu el cristianismu y la hogañu católica Irlanda lo pusu comu el su patrón. Y, entri los sus milagrus, los cuentus idin qu’echó de la Irlanda a tólus bestardus y culebras, de mó y manera que ye verdá que hogañu en Irlanda no hai d’esta crasi d’animalis.

         Comu hi dichu más arriba, no es poca la genti qu’estus días celebran esta fiesta ena que no falta la cerveza pa bebel y la música tradicional pa cantal y bailal. Angunu dirá: “¡y qué mos importa a nusotrus esi santu, que mos importa a nusotrus la Irlanda!” Pos quiciás no tengamus ná de vel cona Irlanda. Peru vamus a vel que quiciás no estamus tan lejus comu creemus...

         La Irlanda es una tierra rica en cuentus y leyenda pa esprical la su hestoria, y estas leyendas uñin a la Península Ibérica cona Irlanda. Breogán, unu de los descendientis d’unu de los reyis de la Irlanda llega a Galicia, jadi una ciudá llamá Brigantia y allí jadi una torri pa qu’el su hiju Ith puea vel, dendi lo altu, la su isla. Hai genti que idi que la vieja Brigantia irlandesa es la Coruña gallega. D’esti mó y manera la Torri d’Hérculis sería la mesma que Breogán jidu pa’l su dagal.

         Lo que aniantis era una leyenda que, comu tóas, tieni la su parti de verdá y la su parti de cuentu, se jadi agora hestoria. Comu diji aniantis, San Patriciu estuvu pregonandu el cristianismu ena Irlanda. La Irlanda, qu’es una de las nacionis celtas, lo mesmu que la Escocia, lo mesmu que la Bretaña, lo mesmu que Asturies, Galicia,... Y qu’el nuestru Reinu de León. La religión qu’antañu tenían tóas estas tierras era la mesma, la religión celta, conos druídas (esus sabius celtas d’antañu) y los sus ritus. Muchus d’estus ritus han llegáu jasta nusotrus disfrazáus pa no sel preseguíus... No tenemus d’olvial que, pa la mayoría de los historiaoris, los Vettonis eran un pueblu celta que, ena nuestra comarca, tenía pueblus y ciudadis tan emportantis comu Miróbriga, Irueña, Lerilla, Las Merchanas,...

         Eran estus Vettonis, además d’un pueblu guerreru (jidu la guerra manu a manu con Viriatu contra los romanus) era un pueblu dedicáu al ganáu. Los Vettonis no desaparecierun cona llegá de los Romanus, ni de los Visigóus, ni de los Morus, sino que siempri siguierun viviendu ena su tierra y guardandu el su mó y manera de vivil. Por esu los pastoris siempri jidun los sus chodus reondus, lo mesmu que jadían los Vettonis las sus cassas dos mil añus antis. Por esu esa querencia que hai ena nuestra comarca por el mundu los torus. Por esu los verracus representaban animalis comu caballus o torus. Por esu siempri ha síu tan emportanti el ganáu ena nuestra tierra. Por esu las nuestras tradicionis son tan especialis. Angunus sabius jasta dijun qu’angunus soníus de la palra leonesa d’El Rebollal venían de la lengua que palraba el pueblu celta de los Vettonis...

         Quiciás los hermanus celtas de la Irlanda no están tan lejus comu pensamus asina que, por qué no, podemus jadel la fiesta comu siempri la himus jechu. Lo mesmu que los nuestrus hermanus celtas irlandesis, con güena bebía, güena alegría y güena música tradicional. ¡Que la vida son cuatru días!