Entri Robris

|

Los reflanis y el tiempu

(versión castellano)

     


foto_2

    Los reflanis son esas frasis cortinas con rima que, de generación en generación, mos van dandu saberis que asina aprendierun los nuestrus agüelus, y ellus de los sus agüelus, y asina jasta quién sabi cuándu.

         Lo mesmu que los bailis, los sonis, las vestimientas, la lengua y otras muchas cosas, los reflanis son parti d’esu que llamamus “cultura tradicional”, que es la que siempri ha pasáu de padris a hijus, cuasi siempri sin estal escrita en ningún láu. Peru no por sel cultura tradicional y no estal escrita es menus emportanti que la cultura oficial. Es jasta más emportanti, pos es parti de la nuestra herencia.

         Golviendu a los reflanis, tós sabemus no unu, sinu muchus reflanis. Y si los sabemus y los seguimus ussandu es pol que sigui siendu verdá lo que idin. En drentru tólus reflanis, hai una crasi que relumbia pol cima las demás: la de los reflanis dedicáus al tiempu que jadi. Algu normal en una tierra comu la nuestra que, a más que a ninguna otra cosa, ha estáu dedicá dendi siempri a los oficius del campu.

 


nievi3jebreru2014

        ¿Ejemprus? Hai abondu d’ellus a lo largu y anchu el nuestru Reinu de León. Peru vos pondré ná más tres o cuatru. Pol apencipial con el añu, cogeré primeru esi que tenemus n’El Rebollal que idi: “Eneru heló a su madri nel lavaeru”. Que no quieri idil otra cosa qu’es nel mes d’eneru nel mes nel que más fríu jadi y cuandu más juertis son los yelus que cain.

         El segundu, en pasandu ya al mes de jebreru, es más conocíu qu’el de antis. N’El Rebollal idimus asina: “Cuandu la Candelaria chora, inviernu fora; si la ves riil, está pol venil”. La Candelaria (La fiesta las Candelas) es el día 2 de jebreru. Sigún idi el reflán, si esi día lluevi (la Candelaria chora), el fin del inviernu está cerca. Peru si jadi sol (la Candelaria ríi), entovía quéa muchu inviernu. Esti añu jidu sol. Al sotru día la Candelaria, n’El Rebollal y la Sierra de Francia nevó, y en tóa la comarca de Ciarrodrigu llovíu y jidu muchu fríu. Y al sotru día (martis) no jidu muchu mejol...

         Otru más d’esti tiempu, quiciás unu de los reflanis más conocíu de tós, es el de “Pol San Bras, la cigüeña verás”. San Bras fiesta mú celebrá en muchus pueblus, es el día 3 de jebreru. Y, anque no me hi fijáu, ya hai mucha genti que me ha dichu que ha veníu la cigüeña (la de verdá, no la que trai los dagalis dendi París)...

  


lumbri

       Pa acabal, el cuartu reflán: “El mejol trashugueru, pa mayu lo quieru”. El trashugueru es, ena lumbri, el palu gordu que s’atraviesa atrás y qu’es el que sostieni a tóa la lumbri pa que no se muera. Lo que quieri idil es que nel mes de mayu, anqu’esté cerquina el veranu, tamién jadi muchu fríu muchus días. Es la versión rebollana del famosu “Hasta el cuarenta de mayo no te quites el sayo”.

         Además d’estus cuatru reflanis, hai otru montonáu d’ellus. De seguru que a tós mos vienin a la cabeza muchus. Y es que, anque anguna genti ajuya d’ella y otra genti la deji de láu, la cultura tradicional sigui valiendu lo mesmu hogañu que antañu. Los reflanis son un ejemplu. Peru las demás partis de la nuestra cultura son igual de emportantis, sobri to en estus tiempus en que quierin jadelmus a tós igualitus que máquinas, númerus sin identidá. Los nuestrus reflanis, las nuestras comías, los nuestrus juegus, los nuestrus bailis, las nuestras vestimientas, los nuestrus sonis y la nuestra palra mos idin a las craras d’andi venimus (en esti casu mos idin que somus leonesis del Reinu de León). Y malamenti la nuestra tierra va a podel il p’alantri si olviamus quiénis somus y d’andi venimus.

         Un últimu reflán mos muestra el caminu: “El que a los suyus se paici, honra mereci. ¿Y quién es más ruín? El que desprecia lo suyu”. Honremus la nuestra hestoria y la nuestra cultura tradicional. Ná más asina honraremus a la nuestra tierra y a la nuestra genti.