Buscando a los abuelos
A tóa la genti mos gusta tenel tiempu libri. Y, en esi tiempu que mos quéa dispués del trabaju, mos gusta jadel muchas cosas: a anguna genti le gusta jadel deporti; a otra, andal por el campu; otrus son más d’aprendel una lengua nueva; muchus quierin aprendel a jadel música con angún estrumentu; a otra genti le gusta leel, vel la teli, il al cini a vel anguna película,... Otrus, sin más, no jadel ná, que pa esu es el tiempu de descansal del trabaju.
Entri los que gastan el su tiempu en
querel aprendel y sabel más d’algu está la genti a la que le gusta lo que tieni
de nombri Genealogía. ¿Y qu’es esu de la Genealogía? En dos palabras, la
Genealogía es esu de buscal parientis y antepasáus. ¿Y por qué jadi esu anguna
genti? Unus por sabel los nombris de los sus antepasáus. Otrus por vel d’andi
vieni la su familia. Anguna genti por vel si tienin angún antepasáu nobri. Otra
genti por vel jasta qué añu p’atrás puedi llegal buscandu... Y se puedi jadel
de muchus mó y maneras. Por ejempru, se puedi miral los antepasáus d’una
persona (padris, agüelus, bisagüelus, tataragüelus,...). Tamién se puedin miral
los que vienin d’una mesma persona: (hijus, nietus, bisnietus,
tataranietus,...). La verdá es que, si te ponis a ellu, es entreteníu y curiosu
abondu.
Anguién a lo mejol idi: tó esu está
mú bien peru, ¿cómu puéu apencipial? Pos el mó y manera más cendillu de
principial es preguntali a la tu familia. Por ejempru, si tengu d’apencipial
con el mi árbul y buscal a los mis agüelus, lo primeru sería preguntali a los
mis padris. La primera generación pol cima de nusotrus son los nuestrus padris.
Asina, ya tenemus dos nombris, conos sus cumpriañus, el día que se casarun,
andi nacierun,... Dispués, se le preguntan a los padris los nombris los agüelus
(los sus padris) y lo mesmu: cuándu nacierun, en qué lugal nacierun,... Y, si
entovía tenemus la suerti de que estén vivus los nuestrus agüelus, jadel lo
mesmu: preguntali a los agüelus polus sus padris. Asina tendriamus ya cuatru
generacionis: nusotrus, padris, agüelus y bisagüelus. Cendillu, ¿verdá?
Asina es comu se puedi apencipial.
Dispués, para tenel más seguras las fechas de nacimientus, bóas,... tenemus
d’il a los Registrus. Hai dos crasis prencipalis: el Registru Civil (dendi’l
añu 1871) y el Registru de la Ilesia (sigún cá pueblu). Lo güenu del Registru
Civil es qu’en tólus papelis vienin muchus datus. Comu ejempru, enos nacimientus,
además el añu y el lugal vienin los nombris de los padris y los agüelus, y el
pueblu andi nacierun. Asina, pa anguién comu yo, nacíu enos añus 70, ná más con
el Registru Civil puedu tenel los nombris y añus de los mis padris, agüelus,
bisagüelus, tataragüelus y los padris de los tataragüelus. Cincu generacionis
p’atrás. Dispués ya tendríamus d’il a los librus de la Ilesia, anque se jadi
del mesmu mó y manera.
¿Y qué podemus encontral jadiendu el
nuestru árbul? Pos muchas cosas curiosas. Y de seguru que naidi (a no sel que
sean hermanus) encuentra las mesmas. Y se puedin aprendel cosas alreol la
hestoria de la nuestra tierra y los nuestrus pueblus. Por ejempru, angunas
vedis aparecin los nombris del alcaldi en esi añu, o se puedi sabel el nombri
del cura que estaba entoncis en un pueblu, o cuándu jadía una vesita el obispu.
Entri las cosas curiosas está que los dagalis portuguesis muchas vecis se
venían a bautizal a los pueblus d’esti láu de La Raya, quiciás guardandu
entovía esi hermanamientu d’antañu. No tenemus d’olvial que los pueblus de las
Tierras de Riba-Coa, lo que hogañu es el Conceju de Sabugal, estuvu aniantis en
drentru el nuestru Reinu de León, jasta’l añu 1297. Y que esos mesmus pueblus entovía
estuvun en drentu el Obispáu Ciarrodrigu jasta’l añu 1404.
Güenu, tampocu quieru descubril
muchus secretus. Esu tieni que jadelu cá unu y, comu diji aniantis, en cá árbul
saldrán las sus sorpresas y cosas curiosas. Si anguién s’anima y va p’alantri,
hai muchus lugaris en interné que vesital y andi te puedin ayual: páginas,
grupus de genealogía (comu el de Genealogía el Reinu de León, pa las provincias
de Salamanca, Zamora y León),... Y quiciás, comu me pasó a mí, encuentras angún
parienti lejanu que te puedi ayual a tapal esus buracus que, de seguru, vas a
tenel cuandu te pongas a buscal.
Si quieris jadel algu diferenti y
aprendel algu más alreol la tu familia y de tí mesmu, ánimati a buscal a los
tus agüelus. Aprenderás y t’entretendrás.