Entri Robris

|

Jotas y fandangus

(Versión Castellano)

foto_2

Hogañu enas telivisionis se puedin vel un montonáu de programas, unus mejoris y otrus peoris. Entri tós estus programas de la teli hai unu con el nombri “Jotas y más” que jadi un recorríu polus grupus, cuasi tós folkóricus, de las nuevi provincias rebujás en esta atonomía (entri las nuevi, las tres provincias leonesas). Un programa que, a pocu que pongas un poquinu d’atención, mos muestra las grandis diferencias que hai entri los grupus de las tres provincias leonesas (Salamanca, Zamora y León) y los de las demás provincias. Diferencias que se puedin vel lo mesmu ena música, enos estrumentus, los bailis, las vestimientas y, angunas vedis, jasta ena lengua.

         Tó estu vieni a cuentu porque n’esti primel programa de la temporá salió el grupu “El Fandangu”, del pueblu de Robrea, ena comarca d’El Rebollal. En otra temporá había salíu ya “El Botón Charro” de Miróbriga. El programa, que no ha muáu muchu dendi que apencipió hai dos o tres añus, rebuja los bailis, sonis y chalras cona genti de dos o tres grupus de diferentis provincias. Esta vés juerun rebujarun dos grupus, unu d’ellus “El Fandangu”. Asina, de las dos horas de programa, una d’ellas jué alreol del grupu de Robrea.

         ¿Y qué se puedi jadel en una hora? Lo primeru, mostral los bailis que han recuperáu y no han dejáu perdel nel lugal: el Ofretoriu, el Son, la Jota de dos pasus (o jota ligiera), la Jota corría y el Fandangu, el baili que da el su nombri al grupu. Además, tocarun (y jidun) unus pasacallis y, pa remati, cantarun angunas cancionis, entri ellas dos ena “palra d’El Rebollal” (el mó y manera en que se palra n’El Rebollal la lengua leonesa): “Calli de las Cuatru Callis” y, anque pusun “Que rompan la Jessa Arriba”, era una rebujina entri esta canción y “La Joya los caballus”. Tamién se pudun vel ena teli el montonáu de vestimientas tradicionalis que se conservan en Robrea, lo mesmu d’hombri comu de mujel. Esti montonáu de trajis, bailis, sonis, tonás y el ussal la palra d’El Rebollal lo mesmu nel nombri comu enas tonás ha jechu del grupu “El Fandangu” unu de los más famosus de la provincia más al sul el nuestru Reinu de León.


albergueria_robreanus_2005

         ¿Y dis quí p’alantri? Pos dal ánimus a los demás grupus a seguil p’alantri y a seguil defendiendu la nuestra cultura tradicional, cultura que son són ná más jotas y fandangus, sinu que lo jadin tamién las vestimientas, los sonis y tonás, y jasta la lengua. Tóas cosas que himus heredáu de los nuestrus padris y agüelus, y que mal jadríamus en dejal perdel. Pol mental a angún otru grupu de la comarca de Ciarrodrigu: “Jálama” (Payu), “El Pandero Cuadrado” (Peñaparda), “El Charaíz Redondo” (Guinaldu), “El Botón Charro” (que ya lo menté aniantis, de Ciarrodrigu), el grupu Santa Clara (tamién de Ciarrodrigu),... Y no olvial qu’en otrus pueblus tamién hai genti que le gusta estu de la cultura tradicional comu Bodón o Saúgu. Y dal ánimus (o pical un pocu, por qué no) a la genti de tós esus pueblus que antañu juerun famosus por el su tamborileru, comu Guadaperu o Retortillu, o polus sus bailis (comu L’Atalaya o Saelicis) y que hogañu han perdíu un pocu de vista lo tradicional.

         Y es que, anque mucha genti quiciás no se ha paráu a pensalu, la cultura tradicional tenemus de fedendela con orgullu. Orgullu porque es algu que himus heredáu de nuestrus padris y agüelus. Orgullu porque los nuestrus antepasáus vivin un pocu en drentru la nuestra cultura tradicional. Orgullu porque la cultura tradicional mos muestra (anque no lo sepamus) una parti de la nuestra hestoria. Orgullu porque la cultura tradicional jadi a la nuestra tierra un poquinu más especial de lo que ya es. Orgullu porque cá vés que tocamus la gaita y el tamboril, o el panderu, o la sartén, o la pandereta, o las castañuelas, o cantamus una canción tradicional, o mos vestimus de charru, o palramus la nuestra lengua, estamus representandu al nuestru pueblu, a la nuestra tierra y a la nuestra genti.

         Defendamus la nuestra cultura tradicional con orgullu.