Entri Robris

(Versión en Castellano)

Tiempus antigus 

Angunas vedis, cuandu vamus a Ciarrodrigu dendi el pueblu, se da el casu de que hai anguna muestra enos muséus de la ciudá, ya sea nel Palaciu Los Águila o ena Casa la Cultura. Digu estus dos porque son los que remúan las muestras. El Muséu el Orinal y el Muséu la Catedral las tienin más de contínu. Y esta vés sabía que ena Casa la Cultura había una muestra d’afotus de Ciarrodrigu, d’un concursu jechu por el Ayuntamientu, además d’otra muestra de dibujus jechus polos dagalis del lugal.

         Quiciás ya lo hi dichu, y de seguru que voi a idilu muchas vedis más. Peru mirandu las afotus de Ciarrodrigu, comu el que da un paséu sin movelsi del lugal, unu güelvi a dalsi cuenta de lo rica, riquísima qu’es la nuestra hestoria. Y es que, sin salil de Ciarrodrigu unu puedi movelsi por sigrus y sigrus d’una hestoria a las vedis bien conocía, a las vedis comu escondía entri las mesmas piedras que miramus y mos miran.

Asina, podemus paseal pola Augustóbriga del tiempu los romanus mirandu las tres columnas o la puenti romana, ciudá que jidun aprovechandu la Miróbriga del pueblu celta de los Vettonis, que dejarun de recuerdu en Ciarrodrigu un verracu.

Dispués de visigóus y morus (de los que hai más restus ena comarca, jasta en los nombris, comu el Podu Moru de Villarrubias) vinu lo que s’ha llamáu Reconquista. Juerun los Reyis de León Alfonsu VI, Fernandu II y Alfonsu IX los que pusun los cimientus pa la Ciarrodrigu que conocemus hogañu. Alfonsu VI golvió a pobral y dió fuerus a Ciarrodrigu y d’unu de los sus hombris, el condi Rodrigo González Girón, vieni el nombri de la ciudá. Fernandu II golvió a pobral Ciarrodrigu y, además de dali el títulu de “civitas” (ciudá), mandó jadel las murallas, golvel a jadel la puenti romana, golvió a dali fuerus y le dió l’obispáu, mandandu jadel la catedral que hogañu mira dendi lo más altu a tóa la comarca. No es d’estrañal que Fernandu II tenga un morumentu en “la su Ciarrodrigu”, pos gran parti de la groria d’antañu y hogañu son pol mé suyu...

Alfonsu IX de León jué el rei que jidu que Salamanca tuviesi Universidá (dendi’l añu 1218) y jué’l primel rei que jidu Cortis, enas qu’estuvu representá Ciarrodrigu, comu ciudá que siempri jué del Reinu de León. Estas juerun las primeras Cortis que se jidun nel mundu. Juerun tamién las primeras enas qu’estuvu representáu el pueblu pol mé los sus representantis de cá ciudá. Y juerun, además, enas que se jidu la Carta Magna Leonesa, qu’es el primel escritu de la hestoria la Humanidá ena que vienin muchus de los derechus fundamentalis que hogañu tenemus comu normalis peru que, pa’l sigru XII, juerun una revolución: se defiendi a la genti contra los abusus del podel, sin miral si es hombri o mujel, ni la crasi a la que perteneci, se dan garantías alreol del secretu el corréu y seguridá de la cassa propia, s’idi que se puedin mandal peticionis al Rei pol mé los representantis, y se prohíbi al Rei jadel la guerra si las Cortis no se lo premitin... Ciarrodrigu estuvu allí. Era’l añu 1188.

No podemus olvial los tiempus que siguierun, que mos dejarun cosas comu el Castillu d’Enriqui II, del sigru XIV, o tós los palacius de los señoris de la ciudá. Y la Guerra la Independencia, quiciás la parti de la hestoria de Ciarrodrigu más estudiá, y de la que se puedi vel una muestra nel Palaciu los Águila, que dendi aquí animu a il a vel.

Quería acabal golviendu p’atrás. Entovía más p’atrás. Ena Casa la Cultura se puedi vel la que, quiciás, es la cosa que más hestoria tieni: el Ídolu de Lerilla. Y es que, antis de los Vettonis y antis de los romanus vivía ena comarca de Ciarrodrigu un pueblu que quiciás nunca no sepamus cómu se llamaba, porque no dejarun ná escritu, peru que vivió aquí, trabajó esta tierra. Lo mesmu que los Vettonis mos dejarun los verracus (el de Ciarrodrigu, el de Lumbralis, la Yegua d’Irueña, el desaparecíu verracu de Peñaparda,...), esti puebru más antigu mos dejó el Ídolu de Ciarrodrigu (hogañu nel Muséu Arqueológicu Nacional), el Ídolu de Lerilla o el Ídolu de Robrea, grandis piedras que, a mó y manera de lápidas, paicin estal jechas pa recordal a grandis jefis o guerrerus de los tiempus de la Edá de Bronci, entri los añus 1.800 y 700 antis de Cristu.

La nuestra hestoria es rica abondu. Mereci la pena conocela. Es un mó y manera d’honral a tós aquellus que vivierun aquí antis que nusotrus. No dejemus que pasi sin más, no la dejemus perdel.