Entri Robris

|

(versión castellano)


foto_2

Apencipiamus un nuevu añu, un añu 2014 que, comu tólus primerus d’añu, vieni acomolgaítu de güenas intencionis, de querel jadel cosas, de querel mejoral, de querel celebral,... Y la verdá es qu’esti añu 2014 tenemus angunas cosinas que celebral que, pol mé de tenel que vel cona religión, van a jadel esti añu algu más Santu que los otrus.



San_Franciscu

Lo primeru que se va a celebral esti añu es el otavu centenariu del pasu de San Franciscu d’Asís pol Ciarrodrigu. O, lo qu’es lo mesmu, esti hombri santu pasó pol Ciarrodrigu hai 800 añus, algu que, de seguru, mucha genti no sabía (yo el primeru jasta hai unus mesis). El casu es que San Franciscu jué a ganal el Jubileu a Santiagu comu pelegrinu, lo mesmu que jadi mucha genti hogañu (pero conos medius d’antoncis, que le da muchu más meritu). Y, a la güelta de Santiagu, pasó por tó’l Reinu de León jasta Ciarrodrigu y, dendi aquí, tomó el caminu Portugal, pasandu por otrus lugaris de la comarca de Ciarrodrigu comu’l Carpiu d’Azaba, Gallegus d’Argañán, L’Alameda de Gardón, Castilleju o L’Aldea l’Obispu. Era el añu 1214 y esti añu que apencipiamus agora se cumprin 800 añus. Un güen momentu pa conocel mejol quién jué San Franciscu y las sus obras y, por qué no, tomal ejempru d’él (no seguil los sus pasus, sinu cogel las cosas güenas que jidu, que juerun muchas).


VirginCaminu

Sin salil del nuestru Reinu de León y de centenarius, esti añu 2014 celebramus otru centenariu: el de cuandu jidun a la Virgin el Caminu comu Patrona prencipal el Reinu de León. Lo mesmu que pasaba con San Franciscu, poca genti sabi que la Virgin el Caminu es tá considerá comu Patrona el Reinu de León dendi el sigru XVIII, y asina apaeci dendi’l añu 1738, y en una real cédula del añu 1778 apaeci con el mesmu títulu. Peru no sería jasta’l añu 1914 cuandu, en siendu Papa Píu X, jué nombrá comu Patrona Prencipal de la Región de León (nombri por esus tiempus del nuestru Reinu de León). Asina qu’esti añu 2014 jadi 100 añus que la Virgin el Caminu jué nombrá comu la nuestra Patrona. Algu que, comu hi dichu un poquinu más arriba, hai poca genti que sabi. D’esti mó y manera, lo mesmu que pa’l otavu centenariu el pasu San Franciscu Ciarrodrigu ha arrimáu el hombru, esti otru centenariu se ha olviáu, comu cuasi jué olviáu el 1100 aniversariu del nacimientu el Reinu de León. Otru güen momentu pa conocel la nuestra hestoria.


Tia_Gora_109

No quería acabal esti escritu alreol de los centenarius sin palral de centenarias. Anque no tieni muchu que vel enas celebracionis que hi dichu aniantis, esti sábadu 4 d’eneru la Tia Gora de Peñaparda jidu 109 añus. Ni más ni menus, lo que jadi que sea, de seguru, la mujel más vieja de la provincia y una de las más viejas el Reinu de León y, por qué no, d’España. 109 añus que le han dáu pa casalsi, trabajal en Francia, tenel unus cuantus dagalis, lleval traviessas a Ciarrodrigu, conocel guerras, reyis y repúbricas, tocal el panderu y, comu no púe sel menus, palral en rebollanu, esi mó y manera especial de palral la lengua leonesa que tenemus n’El Rebollal y que conocemus comu “palra d’El Rebollal”. La Tia Gora es la más vieja, anque no la única en palral asina, ena única lengua de la Península que ha palráu en tóa la vía. Qu’esti escritu acomolgaítu de celebracionis sirva comu homenaji a la Tia Gora y a otras centenarias y centenarius que, anque más nuevas qu’ella, tienin muchu méritu, comu la Tia Lonisia “Cabrera” (tamién de Peñaparda, que tieni 107 pa 108) o la Tia Benedicta de La Puebla (tuvi la suerti de conocela un añu que juí a tocal al su pueblu). Y comu homenaji tamién a tóa la genti que ha sabíu guardal la su cultura y la su lengua.

Qu’esti añu 2014 qu’apencipiamus agora, esti Añu Santu, sea un güen añu pa tóa la genti, y que lo recordemus pa bien pol muchu, muchu tiempu.