El tiempu los que se juerun
En llegandu
esti tiempu las Naviadis, paici que tó es alegría y que tós somus güenus comu
el que más. Y hai que pasalu bien, y hai que regalalsi cosas, y hai que miral
p’alantri. Y, de verdá, tó esu está bien abondu, y yo siempri precuru pasalu lo
mejol que se puedi, y jadel tólus regalus que puéu, y jagu una lista de cosas
que quieru jadel p’al sotru añu. Peru esti tiempu es tamién tiempu d’acordalsi
de los que se juerun, de los qu’un día mos dejarun pa no golvel.
N’esti tiempu
que, más que ningún otru tiempu, gusta passal cona familia, siempri echamus de
menus a los que faltan. Es algu normal. Y cuandu la falta la tenemus de
recienti, siempri dueli más. A tóa la genti le pasa, tós tenemus anguién al que
recordal.
Peru, además
d’nesti tiempu (y nel de Tólusantus), tamién tenemus de recordalus nel restu el
añu. Que naidi s’afronti, de seguru que el 99% la genti s’acuerda de los suyus
tó’l añu. Tamién los habrá que s’acuerdan ná más unu o dos días al añu. Peru
siempri estarán ahí y, comu s’idi, mientris mos acordemus d’ellus no habrán
muertu del tó.
Cá unu s’acuerda
de la su genti al su mó y manera. Y tós son igual de güenus, siempri que se
jaga dendi el corazón. El míu es defendel la cultura que ellus mos dejarun: los
sonis, los bailis, las vestimientas, la palra,... A mí se me jadi mú compricáu
idil que m’acuerdu muchu de los mis agüelus si deju de láu la cultura qu’ellus
mos dejarun, si no defiendu la lengua qu’ellus palrarun,... Y n’esas estamus.
Porque me parecería que les jagu’n féu, qu’empuercu un poquinu la su mimoria,
si jagu otra cosa, si no defiendu la lengua qu’aprendí los mis agüelus, y ellus
de los suyus,... Y asina jasta los tiempus en que llegó a esti rinconinu el
mundu esa palra leonesa qu’angunus amamus comu lo qu’es, comu’n tesoru, comu’n
recuerdu vivu de los antigus. ¿Que a anguién le paici mal? Bien seguru peru,
comu hi dichu, cá unu tieni el su mó y manera d’acordalsi de los suyus y de
honral la su mimoria.
De seguru,
tólus que se juerun quedrían que pasasemus esti tiempu lo mejol que pudiésemus
y tendrían pa nusotrus los mejoris deséus. Qu’esus güenus deséus se repartan pa
entri tós.
Dendi esti
rinconinu el Reinu de León, Felicis Fiestas a tós.