Caminus
Comu s’idi
muchas vedis, hai genti a la que los árbolis no le dejan vel el bosqui. O, lo
qu’es lo mesmu, se quean en lo qu’es cendillu de vel y dejan de láu lo que no
se ve, comu si no juesi güenu, o comu si juesi de segunda. Asina pasa, pol
ejempru, con el tema la cultura tradicional: paici que lo que sali ena teli es
lo únicu que hai, y lo demás es comu si no esistiesi.
Tó estu vieni a
cuentu pol mé los caminus que hai ena nuestra tierra. Muchas vedis mos pensamus
que ná más están las carreteras y llegamus a los lugaris a la que la carretera
mos lleva, cuandu, en saliendu d’ellas un poquinu, podemus llegal a lugaris y
vel cosas d’esas que, al no estal al pie la carretera, paici que no están. Pol
ponel angunus ejemprus, hai que cogel caminus pa podel vel las ruinas vettonas
d’Irueña en Guinaldu, o las de Lerilla en Zamarra, o pa podel bañalsi nel
Riufríu (entri Villarrubias y Peñaparda), o nel Charcu Palu (en Payu), o pa vel
la cantera de ruéas de molinu en Peñaparda, o las minas de golfra en Navafrías,
o las pinturas de Siega Verdi,...
Los caminus los
himus ussáu dendi antigu y, antis d’habel carreteras, era el únicu mó y manera
de llegal a los sitius. Angunus son chiquininus y estrechus, comu las veréas.
Otrus más anchus que llamamus caminus. Otrus que ya s’ussaban pa’l ganáu y eran
entovía más anchus y llamamus cordelis. Los más grandis pa’l ganáu son las
cañás. Los romanus le pusun piedras a los caminus prencipalis pa jadel las
calzás...
Peru golvamus a
los caminus de siempri. Hoi, comu idi el nombri de los mis escritus, vos convíu
a caminal entri robris. Robris que dan el su nombri a la comarca d’El Rebollal
(del robri rebollu). Robris que dan tamién el su nombri al pueblu de Robrea
(tamién n’El Rebollal). Robris que tamién emprestan el su nombri a los lugaris
llamáus Carbajalis, de los que hai muchus nel nuestru Reinu de León: Carbajalis
d’Alba (Zamora), Carbajalinus (Zamora), Carbajal de la Encomienda (Zamora),
Juentis de Carbajal (León), Carbajal de Juentis (León), Puertu del Carbayal
(León),... N’El Rebollal tenemus Carbajalis comu nombri de lugal... “Carbayu”,
“carbalho”,... son otrus nombris del robri en las palras del oesti la Península,
comu el leonés, el gallegu, el portugués,...
Enos robrealis,
anque lo más aparenti son los robris, pol baju se puedin vel crecel otras
prantas comu los jelechus, sanguinus, mostajus, espinerus,... Pol entri los
robris corrin tamién los conejus, las liebris, los jabalinis, las dorras,... Y
no mos olviemus del tercel reinu natural, el de los jongus, que d’ellus hai
abondu ena nuestra tierra, dendi los jongus de los práus jasta los güevus de
rei, pasandu polus nícalus, champiñonis o los gordus.
Una cosa de las
que me gusta jadel es ilimi a dal un paséu polus caminus, entri robris, rodeáu
pola naturaleza por tólus láus. Y, dispués de andal un ratinu, sentalmi a oyel
los ruíus de la naturaleza, de cómu te palran los árbolis, las froris, los
pájarus,... Craru, que no te palran de verdá peru sí que, cuandu cierras los
ojus y güelvis a abrilus, ves el mundu d’otru mó y manera. Cuasi paici que va a
aparecel por el caminu un rebañu de los d’antañu, un caballeru con el su
caballu y el su escudu, o un druída, unu d’esus sabius celtas, arrecogiendu
prantas y froris pa jadel medecinas.
Comu no pué sel
menus, el dal un paséu pola naturaleza es una hestoria diferenti pa cá unu.
Peru dendi esti rinconinu del Reinu de León vos invitu a disfrutal de los
nuestrus caminus, de la nuestra naturaleza, que ya es un tesoru pol sí mesma.
De seguru que si lo jadeis una vés, lo jadréis más vedis.