ENTRI ROBRIS

|

Los nuestrus vedinus 

(versión en castellano)


foto_2

Las gentis que vivimus ena comarca de Ciarrodrigu vivimus en una comarca especial. Me paici qu’en esu estamus tós d’acuerdu. Especial pa lo güenu y pa lo malu. Especial pola su cultura. Especial pola su hestoria. Especial pola su naturaleza. Y especial por el lugal andi está, con Estremaúra y Portugal de vedinus.

         El casu es que, del mesmu mó y manera que pasa nel tratu entri presonas, el tratu entri tierras vedinas tampocu no es muchas vedis comu tendría de sel, y no son pocas las vedis que mos damus la espalda entri vedinus. Y son muchas las cosas polas qu’estamus uñíus a los nuestrus vedinus estremeñus y portuguesis, más de las que pensamus.

         Pol apencipial por angún lugal, vamus primeru a Estremaúra. En drentru la comarca de Ciarrodrigu, somus las gentis d’El Rebollal (anque nu sólu nusotrus) los que más tratu himus teníu de siempri con los estremeñus del otru láu. Tratus no sólu de negociu (que siempri los ha habíu), sinu tamién culturalis. El “jurdanu” es, comu la palra d’El Rebollal, una palra leonesa y, en drentru las palras leonesas d’Estremaúra (agora metías tóas nel nombri “estremeñu”), es la más apaecía a la nuestra. El pueblu Villarrubias comparti cona genti de Cáciris el moti de “mangurrinus”. Mucha genti d’Estremaúra vinu a vivil y casalsi al norti la Sierra de Gata y, al revés, tamién jué mucha la genti d’esti láu la sierra que bajó a vivil y casalsi a Estremaúra...


CastilludeTreveju1

         ¿Y qué idil de la hestoria en común? Tó’l noroesti de Cáciris jué reconquistáu y repobráu a la mesma vés por el Reinu de León, en tiempus de Fernandu II. Esti rei leonés cedió a las órdenis militaris los pueblus de Villarrubias (Ordin de San Juan) y Navafrías (Ordin d’Alcántara). Villarrubias estaba baju la encomienda de Treveju, Navafrías baju la encomienda de Las Eljas,... Por esi tiempu la qu’hogañu es la provincia de Salamanca jué la primera Estremaúra leonesa (Estremaúra=nel otru estremu el Dueru) y la que hogañu llamamus Estremaúra era conocía comu la Transierra (Transierra=pasá la sierra). Peru entovía hai más. Los pueblus de Villamiel, Treveju, San Martín de Treveju, Descargamaría, Robreíllu y Puñunrostru (esti ya desaparecíu) estuvun, jasta’l añu 1833 (en que se jidun las provincias) nel Partíu Judicial de Ciarrodrigu. Y tó’l noroesti de Cáciris, aniantis d’estal nel obispáu de Coria juerun del obispáu de Ciarrodrigu jasta la metá el sigru XX...


CastilludeSabugal

         ¿Y qué podemus idil de Portugal? Además d’il al mercáu del Villal Formosu, el contrabandu del sigru XX jué’l otru gran negociu que mos ha uñíu con el país vedinu. Peru, comu pasa con Estremaúra, es mucha la cultura y la hestoria que himus corríu juntus. Además, craru, del il y venil de gentis, con españolis casáus y emigráus a Portugal y al revés. De seguru que, si podemus llegal lejus abondu, tós tenemus angún antepasáu portugués.

         En cuantu a la cultura, además de tenel muchas palabras apaecías, en Portugal tamién se tocan, comu’n Peñaparda, panderus cuadráus (que los portuguesis llaman “aduffe”). Anqu’en Portugal se tocan cona manu en vés de con porra (comu jademus en Peñaparda).

         Y en cuantis a la hestoria, muchas vedis se olvía que los concejus d’Almeida y Sabugal pertenecierun al nuestru Reinu de León jasta’l añu 1297, añu en que se firmó el tratáu d’Alcañicis por el qu’esas tierras pasaban al Reinu de Portugal (reinu que, tampocu tenemus d’olvial, se independizó del Reinu de León). Leonés era, entri otrus, el Fueru de Los Fayatis, hermanu (si no hiju) del Fueru de Ciarrodrigu. Y estas tierras hogañu portuguesas tienin, con muchu orgullu, el su pasáu en drentru el Reinu de León, tantu que nel Muséu de Sabugal tienin un apartáu enteru dedicáu sólu a esti tiempu, comu lo tienin pa cuandu los romanus o pa la Guerra la Independencia.

         Pa acabal, idil que muchas vedis damus la espalda y miramus pol cima el hombru a los nuestrus vedinus cuandu es muchu lo que tenemus en común, tantu que más que vedinus somus cuasi hermanus. Esperemus que, dis quí p’alantri, los miremus a tós con mejoris ojus. Y es comu idi el reflán: “¿Quién es el tu hermanu? El tu vedinu más cercanu”.