(versión en castellano)
“La Provª de Salamanca, en el Reyno de León, se halla a la parte de
Occidente de la Villa, y Corte de Madrid,[...]”.
Asina apencipia
el “Libru el Bastón” que, escritu nel añu 1770, en siendu Rey d’España Carlus
III, palraba alreol de la comarca de Ciarrodrigu, jadiendu vel lo vadía de
genti qu’estaba en aquellus tiempus, pa preparal una repoblación enas zonas más
despoblás del país, pa golvelas a enllenal de genti, del mesmu mó y manera que
jidun los nuestrus Reyis de León enos sigrus XII y XIII.
Cuandu se
golvió a pubrical el “Libru el Bastón”, nel añu 1929, el hombri qu’escribió el
prólogu el libru, Constancio Bernaldo de Quirós, idía que no había cambiáu ná
enos más de 150 añus que habían pasáu dendi la primera pubricación el libru.
Y llegamus a
esti principiu el sigru XXI. Más de 80 añus dispués de que Bernaldo de Quirós
escribiesi que no había cambiáu ná, ¿tenemus algu nuevu que contal? Pos paici
que no. Los nuestrus pueblus siguin mediu vadíus y la nuestra tierra pareci
abandoná a su suerti. No tenemus más que dalmus un paseínu pola comarca de
Ciarrodrigu y tólus pueblus que hai en ella. El montonáu de despobláus de la comarca
es pa asustal. Pol mental angunus: Pedrosín (Peñaparda), El Villal (Payu), La
Genestosa (Casillas), El Jaqui (Villarrubias), Fonseca (Carpiu), Atalayuela (La
Alberguería), Fradamora (Zamarra),... Ejemprus de lo que antañu juerun pueblus.
Otru montonáu de lugaris tienin mú poquinus vedinus: Sesmiru, Serranillu,
Castilleju d’Azaba, Pedru Toru, Cespedosa,... Los demás anque con algu más de
genti, ven cómu cá vés hai más casas vadías y, paseandu polas sus callis, es
cendillu encontral cassas esbarrungás. Ena mesma Ciarrodrigu se puedin vel un
montonáu de cassas afechás ena parti d’en drentru la muralla...
¿Por qué ha passáu éstu? Lo primeru, polas guerras. La última
guerra con Portugal (s. XVII) jidu que s’abandonaran pueblus comu Pedrosín o el
Villal que nunca más golvierun a sel. La Guerra de Sucesión (s. XVIII) obrigó a
dejal vadíus alreol de 10 añus cuasi tólus pueblus de la comarca, dendi’l añu
1704 jasta’l 1714. La Guerra Civil (1936-1939) jidu qu’en muchus pueblus
muriesi mucha genti. Sin sel causas “naturalis”, se puedi entendel qu’enas
guerras pierdan genti los pueblus. Peru ¿y en tiempus sin guerras? Pos cosas
comu jadel leyis pa beneficial a las ciudadis o a los pueblus grandis, o el no
jadel ná. ¿Cuántas vecis, cuandu vienin los votus, oyemus idil a los grandis
partíus que hai que jadel algu polus pueblus? Toas las vecis que hai votus. Y,
dispués de los votus ¿qué han jechu? Si a la sotra vés güelvin a prometel lo
mesmu, es craru lo que se ha jechu...
El casu es que
paici que dendi’l añu 1770 se sabi qu’ena nuestra tierra tenemus esi problema,
y se idi que se va a jadel tal o cual, peru dos sigrus y mediu dispués las
güenas palabras se las ha lleváu la corrienti, y a Pedrosín, El Villal,
Fradamora, Fonseca,... puedi que dis quí a pocu le sigan otrus muchus. Y lo que
tantu le costó a los nuestrus Reyis de León levantal, tólus que han veníu
detrás han jechu pocu por mantenel...
Hai una canción
de taberna en Peñaparda que idi: “Bebi,
compañeru, bebi y dami a mí / pol vel si matamus otru jabalín...”. Bebamus,
compañerus, pa que los nuestrus pueblus no quedin vadíus. Salú.