Entri robris

|

 (versión en castellano)

Que no mos falti la música 

foto_2

Tólus días de la nuestra vía están acomolgaítus de música, dendi que mos levantamus a la mañana y ponemus la teli o la arradiu jasta que mos vamus a echal a la nochi. Música de los programas, programas de música, música enos anuncius,... ¿Y tó éstu a qué vieni? Pos a qu’el pasáu viernis 22 de noviembri jué Santa Cecilia, patrona de los músicus.

         


conciertu_ciarrodrigu2013

Anque en muchus lugaris esti día pasa comu si ná, en Ciarrodrigu no se quiju dejal passal esti día comu si juesi un día cualisquiera. Asina, la Banda Municipal de Música dió un conciertu nel Teatru Nuevu pol mé d’esi día. Conciertu que tuvimus la suerti de oyel alreol de 150 presonas. Y los maestrus de la Escuela de Música dierun otru nel mesmu lugal esti lunis.

         Comu hi dichu al apencipial esti escritu, tóa la nuestra vía está acomolgaíta de música dendi que nacemus. Los primerus músicus que conocemus son, de seguru, la nuestra madri y, quiciás la nuestra agüela que, en estandu ena cuna o enos sus brazus, mos cantan una nana pa que dejemus de lloral y mos queemus dormíus. De ahí a que mos cantin el “Cumpriañus Felís” hai mú poquininu... Y esta toná no hai añu que falti,... Música hai tamién ena nuestra bóa, ya sea en drentru la ilesia, o a la entrá o a la salía de la mesma (si jadi bóa religiosa), o nel conviti.

    

2012082216.14.09

    La música tieni mucha emportancia ena nuestra vía comu presona. Peru ¿y enas nuestras vías comu pueblu o comu ciudá? Pos tamién. Y, anque hogañu el mal entendíu “progresu” mos ha arrinconáu un pocu, los músicus tradicionalis (tamborilerus, sarteneras, pandereras, acurdionistas,...) siempri han teníu un papel mú emportanti enas vías de los pueblus. Y digu mal entendíu “progresu” porque la genti nueva se piensa que “progresal” es acabal con lo vieju, lo de tóa la vía, y ponel nel su lugal cosas cuasi siempri venías de juera y puestas de móa pola propaganda, siempri interesá, que les jadin ena teli. El verdaéru “progresu” es il p’alantri teniendu comu cimientu lo vieju, lo antigu, y mejorándolu, no acabandu con lo que himus heredáu de los nuestrus antepasáus.

         A lo que ibamus. Las fiestas y reunionis de los nuestrus pueblus, en esti rinconinu del Reinu de León, siempri han estáu marcáus pola música. El añu mueri y apencipia conos villancicus. Dispués vienin los capazus (y luminarias) a San Sebastián, Santa Águeda, San Blas, Sanjuanis,... Fiestas enas que las alborás, pasacallis y bailis tocáus polus tamborilerus jadían d’esus días algu especial. Fiestas enas que se tocaban y bailaban ofretorius (cosa qu’en muchus lugaris ya no se jadi pol razonis más escuras que craras...). Los domingus pola tardi se jadía baili ena praza muchus pueblus, ya juesi con el tamborileru, con el acurdión,... Y nunca no faltaban, según el lugal, jotas, fandangus, ajecháus,... peru tamién bailis agarráus comu el vas corríu o el seguíu.

      


tamborilerus_ssilveriu2004

   Anque menus reconocías (pos tocaban de baldi mientris qu’el tamborileru siempri cobraba), pandereras, sarteneras y pandereteras (que tamién las ha habíu) eran emportantis. Seranus, fiestas familiaris, la matancia,... eran lugaris andi nunca no faltaban los sonis tocáus con panderu cuadráu, sartén o pandereta pa alegral la reunión. Y en pueblus comu Peñaparda o Payu eran pandereras y sarteneras las músicas que jadían (y entovía jadin) el baili tradicional (no el de los domingus, que lo jadía el tamborileru).

         Anque hogañu entovía se conservan muchas cosas, otras se ha perdíu o áina si están perdías pol mé d’esi mal llamaú “progresu” que da más valol a lo de juera que a lo de cassa. Sin querel quital méritus a los demás músicus, que los hai muchus y mú güenus (y a los que tamién mos gusta oyel), estas rayinas quería dedicalas, además de a tólus músicus en general, más que ná a los músicus tradicionalis, pos anque siempri se mos ha miráu comu músicus “de tercera”, himus guardáu, y entovía guardamus, la nuestra cultura tradicional comu los qu’es: un tesoru. Que no mos falti la música, y menus la tradicional.